Pinili ni President Ferdinand Marcos Jr. ni Police Major General Nicolas Torre III nga agbalin kas dadaulo ti Philippine National Police (PNP).
Sukatan ni Torre ni Police General Rommel Marbil a bumaba iti pwesto inton Hunyo siete.
Sigun kenni Executive Secretary Lucas Bersamin, naituding ti turnover command inton Hunyo 2.
Dinakamatna nga idi pay koma Pebrero a nagretiro ni Marbil gapu ta nadanonnan ti compulsory retirement age a 56.
Nupay kasta, inlaylayon ni President Marcos ti termino ni Marbil kas dadaulo ti Philippine National Police iti uppat a bulan kas panagsagana iti eleksyon.
Immuna metten nga impakaammo ni Department of the Interior and Local Government Secretary Jonvic Remulla idi Lunes nga addan ti napili ni Marcos a sumaruno a hepe ti pulisya ngem saanna paylaeng nga inwaragawag ti nagan.
Ni Torre ket agdama a hepe ti Criminal Investigation and Detection Group (CIDG) a nangidaulo iti pannakatiliw da Kingdom of Jesus Christ Pastor Apollo Quiboloy idiay Davao City idi Setyembre 2024.
Ni Torre metlaeng ti nangidaulo iti pannakaiserbi ti arrest warrant manipud iti International Criminal Court kontra kenni sigud a President Duterte idi Marso iti agdama a tawen.
