BAGUIO CITY -Manarimaanen ti makalawas a pilot test iti panagaramat ti COVID-19 at-home antigen self-test kits iti tallo a barangay ditoy
Sigun kenni Mayor Benjamin Magalong, maisaysayangkat ti pilot test kadagiti barangay ti Alfonso Tabora, Pinsao ken Quirino Hill.
Kinunana a manipud iti 60 nga indibidual a nagala ti self-test kits 20 ti nagpositibo iti COVID-19 a katukad ti 30% a positivity rate.
Innayonna a kalpasan ti maysa a lawas manipud iti panakaipatungpal ti pilot test ket mangipatungpalda met ti evaluation ken assessment sakbay ti citywide a panakaiwaras ti antigen self-test kits.
Inyunay-unayna nga addan ti clearance wenno pammalubos nga impaay ti National IATF para iti panakaipatungpal ti nasao a pilot test iti panagaramat ti antigen self-test kits ditoy siudad.
Maibasar iti pagalagadan ti pilot test, dagiti laeng mabalin nga agaramat iti antigen self-test kits ket dagiti addaan ti sintomas ti COVID-19.
