Impakaammo ti Malacañang nga awan ti impormasionda no sadino ti ayan ni Vice President Sara Duterte, kalpasan a saan a mabiripikar ti Office of the Vice President ti agdama a lokasion daytoy.
Saan a mabiripar ti OVP ti lokasion daytoy, sumagmamano laeng nga aldaw sakbay a marugian ti deliberation ti impeachment case kontra kenkuana a naangay idi August 06, 2025.
Sigun kenni Palace Press Officer Claire Castro, awan ti baro nga insubmitir ni Duterte a provisional travel authority.
Innayon ni Castro a ti kaudian a travel authority a naipaay iti Bise Presidente ket idi paylaeng July 5 agingga July 28 no sadino, nagturong daytoy sadiay Netherlands ken South Korea.
Nupay kasta, kinuna ti opisial ti Palasyo a nakaawatda iti impormasion a nagturong ni Duterte sadiay Kuwait.
Impakaammo ni Castro nga adda ti panggep ti bise Presidente nga agturong sadiay Kuwait intun August 8, ngem awan paylaeng ti naawat dagitoy a travel authority nga insubmitir ni Duterte.
Maipalagip nga adu ti foreign trips ni Vice President Duterte ita a tawen, pakairaman ti panagbisitana sadiay The Hague tapno bisitaen ti amana a ni former president Rodrigo Duterte, a nakabalod iti International Criminal Court.
Nagturong metlaeng ti bise Presidente sadiay Hong Kong, Qatar, Malaysia, Australia ken dadduma pay.
