BAGUIO CITY – Agingga ita ket saan paylaeng nga ammo dagiti pulis no asino ti nangibagi iti maladaga a lalaki iti sangwanan ti Building 2 ti Benguet Provincial Capitol idi kalman ti rabii.
Nasarakan daytoy ni Reymarie Velasco, 39-anyos, barangay health worker ken residente ti La Trinidad, Benguet.
Sigun kenkuana, bumabbaba ti lugan dagitoy manipud sadiay Capitol nga agturong sadiay Poblacion, La Trinidad idi nakangngegda iti agsangsangit nga ubing.
Dagus nga insardengna ti luganda ken sinapolda ti pagtataudan ti sangit ti ubing.
Ditoy a nakitada ti maladaga a nakadisso iti sangwanan ti pasdek nga awanan iti kawes wenno lampin ken nakakabit latta ti umbilical cord wenno puseg daytoy.
Inturongda ti maladaga iti Benguet General Hospital para iti panakataming daytoy.
Naamuan nga agdagsen ti maladaga iti 1.63 kilograms ken mapapati a naipasngay kalpasan ti tallopulo ket uppat nga oras sakbay ti panakarasak daytoy.
