BAGUIO CITY – Dakkel ti panagyaman ti probinsia ti Benguet iti panakailukat ti Malasakit Center iti Benguet General Hospital (BeGH).
Binigbig ni Governor Melchor Diclas a dakkel ti maitulong ti Malasakit Center iti pagsayaatan dagiti umili ti Benguet.
Impanamnama met ni BeGH Acting Chief of Hospital Dr. Meliarazon Dulay a maaramat a naimbag ti pondo ti center para kadagiti pasiente a kangrunaan nga agkasapulan iti tulong.
Indauluan ni Senator Bong Go ti virtual launching ti nasao a Malasakit Center.
Inallukoy ti senador dagiti opisial ti Benguet nga agkaykaysa tapno pagnumaran a naimbag dagiti residente ti nasao a center.
Agserbi ti Malasakit Center kas one-stop shop tapno matulungan dagiti nakukurapay a pasiente a maaddaan iti financial medical assistance manipud iti Department of Health, PhilHealth, Philippine Charity Sweepstakes Office, ken Department of Social Welfare and Development.
Ti Malasakit Center ti Benguet ti maika-92 a nailukat iti pagilian ken maikatlo iti Cordillera kalpasan nga immunan a nailukat ti Malasakit Center iti Baguio General Hospital and Medical Center ken iti Far North General Hospital and Training Center sadiay Luna, Apayao.
