Impila ti Office of the Ombudsman ti malversation complaint kontra kada Ako Bicol Party-list Rep. Zaldy Co ken dadduma nga opsiyales ti Department of Public Works and Highways (DPWH) gapu iti ghost flood control project sadiay Bulacan.
Sigun iti Ombudsman idi Agosto 28, 2026, napondoan ti proyekto iti P77 million ngem saan a naaramid.
Naituding ti pannakairugi ti proyekto idi February 24, 2025 ken naideklara a 100% a naileppas idi May 2, 2025.
Nupay kasta, naduktalan iti inspeksyon a saan a pulos a narugian ti nasao a proyekto.
Gapu iti dayta, kinuna ti Ombudsman nga adda ti umdas a rason tapno makasoan iti Malversation of Public Funds babaen ti Falsification of Public Documents ni Co, Henry Alcantara, Brice Ericson Diaz Hernandez, Arjay Salvador Domasig, Jaypee De Leon Mendoza, Niño Lawrence Vergara Morales, Juanito Coronel Mendoza, Floralyn Yutuc Simbulan ken Christina Mae Del Rosario Pineda.
Aglemlemmeng paylaeng ni Co iti ruar ti Pilipinas bayat a naidarum da John Paul Estrada ken Mark Tecsay, staff members ti Co.
Kabayatanna, saan a nairaman ni Alcantara iti pannakaipila ti impormasyon kalpasan a naipasidong iti witness protection program.