BAGUIO CITY- Pagsagsaganaan ita ti Environmental Management Bureau (EMB) – Cordillera ti manamnama a panagadu manen dagiti basura a makolektar iti Baguio kasaruno ti panakaipasidong ti siudad iti Alert Level 1.
Sigun kenni EMB-Cordillera Regional Director Maria Victoria Abrera, manarimaan ti panangwanawanda iti “handling and management” ti lokal a gobyerno kadagiti basura, partikular dagiti solid waste kadagiti ospital, opisina, malls, hotels, nagduduma a parke ken dadduma a lugar a kadawyan a pagturturongan dagiti tattao.
Kinunana a maysa a tutukanda ti panangimanehar ti Baguio General Hospital and Medical Center iti health care waste daytoy nangruna ta ti nasao a pagagasan ti nakailista iti kaaduan a hazardous ken toxic wastes iti siudad a dumanon iti 428,000 kilograms.
Nupay tinagiragsakda ti panakaipasidong ti Baguio iti Alert Level 1 a makatulong iti panagrekober ti ekonomiya, impeksa ni Abrera a malidayanda gapu iti manamnama a dakkel nga epekto daytoy iti aglawlaw nangruna ti in-inot a panakapalukay dagiti restrictions.
Kagiddan iti daytoy, ipalpalagipna manen ti umno a panangibelleng kadagiti basura nangruna dagiti na-aramat a medical wastes ken dadduma pay a basura nga adda pakainaiganna iti agdama a pandemya.
