BAGUIO CITY – Tubtubngaren ti maysa a grupo dagiti estudyante iti rehion Cordillera ti manamnama a panakakissay ti pondo ti sektor ti edukasyon inton 2022 a mangapektar kadagiti State Universities and Colleges (SUCs).
Iti panakiuman ti Bombo Radyo Baguio kenni Louise Montenegro, panakangiwat ti grupo dagiti estudyante iti lokalidad, dinakamatna a dumanon iti P500-M ti maksay a pondo kas nailanad iti 2022 National Expenditure Program.
Sigun kenkuana, maiyaplikar metlaeng ti nasao a panagkissay ti pondo kadagiti innem nga SUCs iti rehion.
Dinakamatna met a kangrunaan a maapektaran iti rehion ti Mountain Province State Polytechnic College a maksayan ti pondo iti dumanon P180-M.
Inlawlawagna a pakaseknanda ti panakakissay ti capital outlay gaputa daytoy ti maaramat iti imprastraktura ken kontruksyon dagiti kanayonan a pagadalan.
Innayonna pay a gapu iti bugdet cut ket awan ti nailatang a capital outlay iti Benguet State University ken Abra State University bayat a bimmaba iti 47-49% ti pondo dagiti daduma nga SUCs.
Impaganetget ni Montenegro a makaapekto daytoy iti karkaro a panakaitantan ti panaglukat ti face-to-face classes gaputa saan a matarimaan ken mapapintas dagiti pagadalan.
Linaon ti National Expenditure Program dagiti detalye iti proposed programs ti gobyerno ken maisumsumitir iti Kongreso tapnu matulongan dagiti mammanday linteg iti panagrepaso ken panagtalantan dagitoy iti singasing a national budget para iti panakabukel ti pondo ti sumaruno a tawen.
