Mangnamnama ti Israel a mawaya-wayaan dagiti nakawtibo nga umili manipod iti ima dagiti militante a grupo nga Hamas ita a Lunes.
Iti statement ni Israeli Prime Minister Benjamin Netanyahu, ti nasao nga aldaw ti rugi ti baro a dalan ken patienna a ti manamnama a panakawaya-waya dagiti kawtibo ket maysa a pakasaritaan iti nasao a pagilian.
Nupay kasta,kinuna ni Netanyahu nga saan pay a nalpas ti amin ken agtaltalinaed a bigbigbigenna dagiti dakkel a karit iti seguridad.
Iti agdama, agtultuloy ti panakipagkitana kadagiti pamilya dagiti kawtibo ken inkarina kadagitoy a maisubli dagiti ipatpategda.
Malaksid kadagiti sibibiag a kawtibo, manamnama metlaeng a maisubli ti bagi dagiti kawtibo a nakumpirmar a pimmusayen.
Maibasar kadagiti napalpalabas a tignay, umuna a maipaima dagiti kawtibo iti Red Cross, kasaruno dayta, maipaima dagitoy iti Israeli military a nakabase idiay Gaza para iti inisyal a medical checks sakbayda a maisubli kadagiti pamilyada idiay Israel.
Kalpasan dayta, manamnama met a mawaya-wayaan dagiti balud a Palestinian a maibasar iti napagnumwan a katulagan para iti ceasefire ket dumanon iti agarop 2000 a balud pakairamanan dagiti agarop 250 a nasentensyaan iti tungpal biag a panakaibalud.