BAGUIO CITY – Maituloy latta dagiti manarimaan ken naituding a licensure exams ditoy Baguio iti baet ti panakaipasidong ti siudad iti Alert Level 3.
Inwaragawag daytoy ni Juanita Domogen, Regional Director ti Professional Regulation Commission (PRC) – Cordillera iti panakiuman ti Bombo Radyo Baguio.
Sigun kenkuana, uray Alert Level 3 ti Baguio ket awan ti mabaliwan kadagiti nabukelen a pagalagadan dagiti eksaminasyon nga isayangkat ti PRC.
Dinakamatna a binukelda dagiti pagalagadan ken dagiti inaramidda a panagsagana para kadagiti nasao nga eksaminasyon ket para iti Alert Level 2 ken Alert Level 3 a sitwasyon.
Kinunana a tunggal exam room ket aglaon iti siyam laeng nga examinee gapu iti 18% indoor capacity iti panakaisayangkat dagiti eksaminasyon.
Sigun kenkuana, kadakkelan nga eksaminasyon iti siudad ti Licensure Examination for Teachers a pasetan ti nasurok 2,500 nga examinees inton January 30.
Manarimaan metten ti practical exam dagiti 114 nga examinees para iti Dentists Licensure Exam nga agleppas inton January 11 a sarunuen ti written exam inton January 12-14.
Maangay pay inton January 15-16 ti Medical Technologist Licensure Exam dagiti 688 nga examinees a sarunuen ti Architecture Licensure Exam inton January 21 ken 23 para kadagiti 313 nga examinees.
Inyunay-unayna a dagiti saan a fully vaccinated nga examinees ket maipasidong iti RT-PCR testing.
Innayonna a no makitaan ti sintomas ti maysa nga examinee sakbay wenno kabayatan ti mismo nga eksaminasyon ket maisardeng ti panag-eksamin ti maseknan.
Sigun pay kenkuana, manarimaan ti panagalada ti kanayonan a personnel tapnu maipanamnama ti umdas a bilang dagiti agbantay kabayatan dagiti eksaminasyon.
Kabayatanna, linawlawagan ni City Tourism Operations Officer Engr. Alec Mapalo a mabalin a sumrek iti siudad dagiti makipaset kadagiti licensure ken board exams babaen iti panangilanadda nga essential travel ti panagbiaheda paturong ditoy Baguio.
