Panggep iti lokal a gobierno ti Baguio City a mangilatang iti pondo tapno aramiden a mandatory ti deworming kadagiti estudiante, kagiddan iti panagsuro iti umno a panangugas iti ima.
Sigun kenni Baguio City Councilor Leandro Yangot Jr., rumbeng a maipasidong iti deworming ti amin nga estudiante iti parapubliko a kindergarten, elementarya, ken sekundaria, kasta metten dagiti ubbing iti daycare centers.
Puntiria iti programa dagiti agtawen iti 1 agingga iti 19, a maipaayan iti agas kontra iti bulate a saan a bummaba iti dua a gundaway iti tunggal a tawen.
Kinunana a rumbeng daytoy nga aramiden iti City Health Services Office iti tunggal tawen tapno masalakniban ti salun-at, mapasayaat ti nutrision, ken masuportaran ti mental ken pisikal a panagdur-as kadagiti ubbing.
Sigun met iti Department of Health, napateg ti deworming tapno maliklikan ti intestinal worms, malnutrition, ken stunting, ken masigurado ti nasayaat a panagdakkel dagiti ubbing.
Impaganetgetna metlaeng ti kinapateg iti kinadalus, karaman iti panangugas iti ima sakbay ken kalpasan a mangan ken agaramat iti banyo, panangputed iti kuko, panagkawes iti tsinelas ken sapatos, panagaramat iti nadalus a kasilyas, ken natalgaed a taraon ken mainum a danum.
Panggepda metlaeng nga iraman dagiti nasao nga addang iti regular a programa iti city health office at DepEd-Baguio, nga addaan iti kaskenan a pondo iti tinnawen a budget.
