BAGUIO CITY–Saan a kankanunungan ni Benguet Governor Melchor Diclas ti disenyo ti motorcycle barriers nga inaprobaran ti Inter-Agency Task Force on Emerging Infectious Diseases(IATF).
Iti panakiuman ti Bombo Radyo Baguio, kinunana a narisgo ken saan a natalged ti panangimuntar ti barriers kadagiti motorsiklo gapu iti kasasaad ti kalkalsada iti rehiyon nangruna kadagiti nasusulinek a lugar.
Sigun kenkuana, saanen a kasapulan ti barrier gaputa dagiti met laeng agasawa wenno agkabalay ti mapalubusan nga agangkas wenno aglubbon iti motorsiklo.
Inlawlawagna a posible a mangitunda laeng iti aksidente ti panagaramat iti barrier iti motorsiklo.
Immuna metten a kinuna ni LTO-CAR Regional Director Francis Ray Almora a napeggad ti panakaimuntar ti barriers kadagiti motorsiklo gapu metlaeng iti kapada a rason.
Maipalagip a kinuna ti opisyal a mabalin nga iyapelada iti National IATF ti panakaikonsidera ti Cordillera a mailaksid iti motorcycle barriers para metlaeng iti kinatalged dagiti umili ti rehion.