BAGUIO CITY – Naan-anay a naiparikep ti 4-storey bunkhouse sadiay Virac, Itogon, Benguet kalpasan a nagpositibo iti COVID-19 dagiti agnanaed iti daytoy.
Napagnummuan iti naipatungpal nga emergency meeting a mailockdown ti nasao a pasdek ken maibilang a positibo a kaso ti amin a nakapulapol dagiti immunan a nagpositibo.
Agtitinnulong ti pulisya, opisial ti barangay ken Benguet Corporation iti pannakabantay ti lugar bayat a mangipaay iti taraon ti Department of Social Welfare and Development.
Napagsasaritaan pay kabayatan ti taripnong a masapul a maipasidong iti COVID-19 testing ti amin nga staff ti Philex Mines ken ISRI.
Maipalagip a dagus a nagpaabayab ni Governor Melchor Diclas iti emergency meeting kalpasan a nailista ti kangatuan a kaso ti COVID 19 iti probinsia ti Benguet itay kanikadua no sadino, kaaduan kadagiti kaso ket nairekord sadiay Itogon, Benguet.
Immunan a naipasidong iti lockdown ti Sitio Luneta iti Barangay Loacan; Sitio Sangilo, Poblacion; Balatoc, Virac ken Eastern Saddle, Ampucao gapu iti kaso ti COVID-19.
