Inwaragawag ni Department of Budget and Management (DBM) Secretary Amenah “Mina” Pangandaman ita nga aldaw a makaawat dagiti kwalipikado a mangmangged iti gobierno iti “midyear bonus” mangrugi into Mayo a kinse iti agdama a tawen.
Gapu iti dayta, pinalagipannna dagiti amin nga opisina ken ahensia iti gobierno nga ipasiguradoda a nasapsapa ken umno nga oras iti panangipaay ti “bonus” kadagiti mangmangged kas maitunos iti agdama a pagannurutan ken linteg.
Ti gatad ti “midyear bonus” ket maysa a bulan a “basic pay” dagiti kwalipikado a mangmangged iti gobierno.
Maipaay ti bonus kadagiti empleyado a nagtrabaho iti uppat a bulan manipod Hulio a uno idi napalabas a tawen agingga Mayo a kinse iti agdama a tawen.
Dagiti empleyado ti gobierno ket rumbeng a nagtrabaho iti gobierno manipod Mayo a kinse ken kasapulan a nakaawat iti “satisfactory score” iti “applicable performance rating period”.
Karaman kadagiti makaawat iti “bonus” ket dagiti civilian personnel, pakairamanan ti regular, casual, ken contractual nga empleyado.
Malaksid iti dayta, karaman metlaeng dagiti “appointive” wenno “elective positions” iti nagduduma nga ahensia ti gobierno ken institusion a kas ti Executive, Legislative, ken Judicial branches, Constitutional Commissions ken dadduma pay a Constitutional Offices, State Universities and Colleges (SUCs), local government units (LGUs) ken dadduma pay.
Pakairamana pay dagiti “military” ken “uniformed personnel” iti Armed Forces of the Philippines, Philippine National Police, Philippine Public Safety College, Bureau of Fire Protection, Bureau of Jail Management and Penology, Bureau of Corrections, Philippine Coast Guard, ken National Mapping and Resource Information Authority.
Kabayatanna, inkeddeng dagiti maseknan a “local government boards” ti nakalatang para iti midyear bonus dagiti personnel kadagiti probinsia, siudad, munisipyo, ken barangay kas maibasar iti “policy conditions” iti sidong iti DBM Budget Circular No. 2017-2.
