BAGUIO CITY – An-anupen paylaeng dagiti otoridad ti maysa a kriminal ken ti kadwa daytoy a nakipinnaltog kadagiti pulis sadiay Santa Lucia Subdivision, Asin Road, Baguio City idi rabii ti April 18.
Sigun iti pulisya, manarimaan ti panag-checkpoint ti Baguio City Police Office – Station 9 idi nakitada ti maysa nga SUV nga addaan plaka nga ABI 1736 a paturong iti direksiyon ti checkpoint.
Naalerto dagiti pulis kalpasan a nabigbigda ti driver a ni Christian Del Prado Alvar alyas Sadeek, 35-anyos, tubo ti Sta. Barbara, Pangasinan, residente ti Amistad Road, Camp 7, Kennon Road, Baguio City nga addaan ti standing warrant of arrest iti kaso a murder ken konektado pay iti iligal a droga.
Pinara dagiti pulis ti nasao a lugan ngem saan a simmardeng ni Alvar ken pinartakanna pay ti taray ti lugan.
Kabayatan ti panaglibasda ket dua a daras a pinaltogan ti kadwa ni Alvar dagiti pulis a nagresulta tapnu agbales met dagiti pulis.
Nupay kasta, nakalibas latta dagiti dua agingga a nasarakan dagiti pulis ti lugan nga inabandona dagiti dua sadiay Purok 23, San Carlos Heights, Baguio City.
Tallo a daras a natamaan iti bala ti paltog ti nasao a sasakyan ngem mapapati a saan a nadangran dagiti suspek.
Inruar metten ti pulisya iti pakdaar a ni Alvar ket ‘armed and dangerous’.
