Naka-red alert ti Manila Disaster Risk Reduction and Management Office (DRRMO) ken Metro Manila Disaster Risk Reduction and Management Council (MMDRRMC) para iti “peace rally” ti Iglesia ni Cristo (INC) ita nga aldaw.
Ti red alert ket mangipasimudaag nga amin a personnel ti Disaster Risk Reduction and Management Office ken Metro Manila Disaster Risk Reduction and Management Council ket kasapulan a naka-duty tapno agresponde iti aniaman nga emerhensia.
Iti maysa nga statement, kinuna ti Office of Civil Defense a panggep ti tignay a maipasigurado ti komprehensibo a safety measures para iti nasao nga aktibidad, a manamnama a makaawis ti dumanon iti maysa a milion a makipaset iti Quirino Grandstand.
Sigun kenni George Keyser, director ti Office of Civil Defense National Capital Region, ti kinatalged ti kangrunaan a prayoridadda.
Kabayatanna, sigun kenni Edwin Nasol, vice president for Disaster Preparedness and Emergency Response of the Society of Communicators and Networkers (SCAN) International a dumanon iti 17,000 a kameng ti Iglesia ni Cristo (INC) ti maideploy para kadagiti panagregget iti panagsagana ken panagresponde iti emerhensia.
Mainaig iti dayta, dumanon iti tallo a ribo a kameng ti pulisia ti maideploy idiay Metro Manila ita nga aldaw, sigun iti pannakangiwat ti Manila Police District a ni Police Major Philipp Ines.
Agarup sangagasut duapulo a personnel kaduada ti dua nga urban search and rescue teams manipod iti Philippine Army’s 525th Engineer Combat Battalion (525th ECB), para iti peace rally ti Iglesia ni Cristo (INC).
Immunan a simmangbay ti kaaduan a tattao iti lugar idi kalman sakbay ti programa, bayat a kinuna ti Commission on Elections kadagiti kandidato iti masungad nga eleksion a saanda nga agkampania bayat ti rally.
Idi Disiembre idi napalabas a tawen, inwaragwag ti nasao a simbaan a mangisayangkatda ti peace rally nu sadinno, kinunanada a suportaanda ti statement ni President Ferdinand “Bongbong” Marcos Jr. kontra iti impeachment ni Vice President Sara Duterte.
Kinuna gamin ni President Marcos Jr a saan nga a makagunggona iti siasinoman ti panangi-impeach kenni Vice President Duterte.
