Nagbalakad ti Department of Agriculture– Cordillera kadagiti amin a mannalon nga ireportda ti pannakadadael gapu iti saan a nasayaat a paniempo kadagiti mulada, talon ken alikamen tapno ma-assess ti gobierno ti kasapulan a tulong.
Sigun kenni Atty. Jennilyn Dawayan, DA-CAR executive director, kayatda a maamuan ti sitwasyon tapno dagos nga agtignay ken mangisayangkat ti maitutop nga addang nangruna iti panangasistar iti panagrekober.
Mabalin nga isubmitir dagiti mannalon ti reports iti barangay agriculture extension worker wenno iti masakupanda a Municipal Agriculture Office.
Makidkiddaw kadagiti mannalon, livestock raisers ken dadduma pay iti sektor a mangipaay ti impormasion a kas ti lokasion ti nagmulaanda, kita ti naimula, land area, kasasaad ti naimula a prutas, ti naapektaran nga area, ti ayup a matartaraken, bilang dagiti ayup ken tawen dagiti naapektaran nga ayup, kita ti machinery damaged, ken ti gatad ti nadadael.
Ti impormasion ket kasapulan a napakuyugan kadagiti ladawan ken nagan ti indibidual tapno nalaka a mailasin.
Kinunana manen ti DA a kasapulan ti panagrehistro dagiti mannalon iti RSBSA.
Ti RSBSA ket mangipalubos iti gobierno a makakita iti aktual a datos a mangiwanawan kadakuada iti panagaramid kadagiti pangngeddeng maipapan iti industria ti agrikultura iti pagilian.
Indagadag ni Dawayan kadagiti mannalon a mangisubmitir iti reportda iti nasapa tapno mapalubosan a dagus ti DA a mangaramid iti kasapulan a rekomendasion para iti tulong.
