Adda gundaway dagiti mannalon a makagun-od iti ad-adu no mabalinda ti aglako iti unhusked rice wenno pagay a direkta iti National Food Authority (NFA).
Umap-apela ni National Food Authority Adminstrator Larry Lacson kadagiti mannalon nga ilakoda ti pagayda iti ahensia tapno magun-odda ti nasaysayaat a presio dagiti apitda.
Para iti nadalus ken namaga a pagay, gatangen ti National Food Authority iti P24 tunggal kilo bayat a ti presko wenno nabasa a pagay ket mabalin a gatangen iti P18 tunggal kilo.
Itay laeng nabiit, inkeddeng ti NFA nga ipangato ti buying price ti nadalus ken namaga a pagay iti P24 manipod iti P23 kalpasan ti damag a bumabbaba ti presio ti pagay.
Sigun kenni Lacson, daytoy nga addang ket tapno mapalubosan dagiti mannalon a mangilako kadagiti apitda iti nangatngato a presio.
Immapela ni Lacson kadagiti Local Government Units a tulungan dagiti mannalon iti pannakaidanon ti pagay kadagiti bodegada a makatulong a mangpababa iti gastosda iti transportasion.
