BAGUIO CITY- Nakemmeg ti maysa a mannalon gapu iti gandat a panangpaltogna iti padana a mannalon sadiay Brgy. Ap-apaya, Villaviciosa, Abra idi rabii.
Nabigbig ti suspek a ni Roy Dangatag Alonen, 49, bayat a ti biktima ket ni Dennis Cantero Candido, 35, agpada a residente iti nadakamat a lugar.
Maibasar iti inisyal nga imbestigasyon, timmaud ti nabara nga argumento iti nagbaetan ti biktima ken suspek kabayatan ti panagin-inom dagitoy iti arak.
Naanawa dagitoy ken nagawid ti suspek sakbay a simmaruno ti biktima.
Nupay kasta, nagsinnupiat manen dagitoy agingga nga inruar ti suspek ti paltogna a homemade caliber .38 revolver ken pinaputokanna ti biktima iti sumagmamano a daras ngem nakataray ti biktima ken naglemmeng iti balayna.
Iti panagresponde dagiti pulis ket kinemmegda ti suspek ken narekoberda met laeng ti inaramat daytoy a paltog.
