BAGUIO CITY – Maan-anop ita ti mannalon a suspek iti panakatagtagbat ti maysa a mannalon sadiay San Pablo, Doña Loreta, Pudtol, Apayao idi kanikadua.
Nabigbig daytoy a ni Artemio Constantino aka ‘Totoy’ wenno ‘Pugsit’ bayat a nabigbig ti biktimana a ni Virgilio Usita Canonizado, 77-anyos.
Maibasar iti report, aglutluto ti asawa ti biktima idi simmangpet ti suspek iti pagtaenganda ken sadiay a nagpukpukkaw ken karkaritenna ti biktima.
Kalpasanna, pwersado a simrek ti suspek iti pagtaengan ti agasawa a Canonizado ken sadiay a tinagtagbatna ti biktima iti sumagmamano a daras.
Timmaray ti asawa ti biktima ken idi nagsubli ket nasangpetanna ti biktima a nakadasay iti datar ken napumpunno ti dara.
Nagpatulong ti asawa ti biktima iti anakda ken inatarayda daytoy iti pagagasan.
Nagsagrap ti biktima iti tagbat iti rupa, ulo, kanigid a luppo ken iti kanigid a tammudo ti saka.
Manarimaan met ti manhunt operation para iti panakakemmeg ti suspek.
