BAGUIO CITY – Malamlamayan ita ti maysa a mannalon bayat a kritikal ti kondisyon ti kabsatna kalpasan a napalpaltogan dagitoy sadiay Bulanao Centro, Tabuk City, Kalinga idi kalman.
Nabigbig ti pimmusay a ni Basingan Dallapas, 24-anyos bayat a ti kabsatna a nadangran ket ni Belac Dallapas, 21-anyos, agpada a residente ti Bulanao, Tabuk City, Kalinga.
Maibasar iti report, gimmatang ti agkabsat iti arak ken nagturongda iti abay ti pagtagilakuan a gimmatanganda tapnu sadiayda nga aginom.
Kalpasan ti sumagmamano a minutos, simmangpet ti maysa a motorsiklo ken nagdissaag ti back rider.
Nagsaritada kadagiti biktima aginnga a timmaud ti susik dagitoy ken sadiay metten a nakangngeg ti testigo iti nagsasaruno a putok ti paltog sakbay a dagus a naglibas dagiti suspek.
Naideklara a dead on arrival ni Basingan Dallapas a nagsagrap ti maysa a tama ti bala ti paltog iti ulo bayat a nagsagrap ni Belac Dallapas iti maysa a tama ti bala ti paltog iti baba ti kanigid a lapayagna.
Agtultuloy met ti imbestigasyon dagiti pulis iti nasao nga insidente.
