BAGUIO CITY – Pimmusay ti maysa a mannalon kalpasan a naiyanod sakbay a nalmes sadiay Apayao idi agsapa kalman.
Nabigbig daytoy a ni Rodrigo Salarzon Garcia, 68 anyos, residente ti Cabatacan, Pudtol, Apayao.
Maibasar iti report, nagturong ti biktima ken ti kaduana a ni Nolie Camangeg iti talon tapnu kitaen dagiti nuang dagitoy.
Nupay kasta, bayat ti panagballasiwda iti nalayos a kalsada, partikular iti nagbaetan ti rangtay ti Cabatacan ken San Mariano ket killaat a naiyanod dagitoy gapu iti napigsa nga ayos ti danum.
Gapu iti daytoy, naglangoy ni Camangeg agingga iti nasao a rangtay ngem naiyanod ni Garcia.
Kalpasan ti sumagmamano nga oras a search and rescue operations dagiti pulis, bombero ken Municipal Disaster Risk Reduction and Management Council ket nasarakan ti bangkay ti biktima.
