BAGUIO CITY- Pimmusay ti maysa a mannalon kalpasan a pinaltogan daytoy ti padana a mannalon sadiay Kumao, Kabugao, Apayao idi malem kalman.
Nabigbig ti biktima a ni Alfredo Dinnong, 45-anyos, naasawaan bayat a nabigbig ti suspek a ni Denmar Balicnang, 28-anyos, baro, agpada dagitoy a residente ti nasao a lugar.
Maibasar iti report, simrek ti biktima iti kusina ti balay ti suspek ken iti awan umno a rason ket tinagbatna ti managan Boyet Sadao a kabsat ti suspek babaen iti buneng ngem nakaliklik ni Sadao a nagresulta iti panaggabbo dagitoy.
Nakita ti suspek ti mapaspasamak isut gapuna a nagturong iti silidna ken sadiay nga inalana ti paltog daytoy a carbine nga inaramatna a nangpaltog iti biktima a nakaiggem iti buneng.
Natamaan ti kanawan a paset ti bagi ti biktima a nagresulta iti dagus nga ipupusay daytoy.
Boluntaryo met a simmuko ti suspek iti pulisya ken insukona metlaeng ti paltog nga inaramatna.