Inladawan ni Senate President Vicente “Tito” Sotto III a mabalin a makaapektar iti imahe ti Pilipinas ti mapangpanggep a panakaimpeach ni President Ferdinand Marcos Jr. ken Vice President Sara Duterte.
Sigun kenni Senator Sotto, nakababain para iti pagilian ti nasao a tignay kontra iti presidente ken bise presidente rason a mangnamnma daytoy a saan a mapasamak.
Iti baet dayta,kinuna ti senador a nakasagana latta dagitoy nga awaten dagiti maipila nga impeachment complaints iti kanito a makadanon iti Senado nga agserbi metlaeng nga impeachment court.
Innayonna a kasapulan ti upper chamber nga aksyunan a dagus dagiti maawatda nga articles of impeachment.
Maipalagip nga immuna metten nga impeksa ni Majority Floor Leader ken Ilocos Norte Representative Ferdinand Alexander “Sandro” Marcos a saan a lapdan ti Kamara dagiti anyaman nga impeachment complaint a maipila uray pay dagiti kontra iti amana a ni President Ferdinand Marcos Jr.
Iti panakisango ni Sandro kadagiti kameng iti media, inlawlawagna a denggen ken ikonsidera ti lower house dagiti amin a maipila nga impeachment complaints.
Impettengna a responsibilidad ti plenary nga ipaima dagiti impeachment complaints iti House Committee on Justice maitunos metlaeng iti Konstitusyon.
