BAGUIO CITY – Nakemmeg ti mapapati a lider ken tallo a miyembro ti maysa a grupo a nangbiktima iti adu a negosyante iti siudad ti Baguio babaen iti investment fraud wenno peke a panagpuonan.
Resulta daytoy ti naingetan a manhunt operation dagiti operatiba ti Baguio City Police Office (BCPO) tapnu makemmeg dagiti adda iti likudan ti Phoenix Blitz Criminal Gang.
Immuna a nakemmeg dagiti tallo a miyembro ti grupo sadiay Sindalan, San Fernando, Pampanga babaen iti bileg dagiti warrant of arrest nga impaulogda Presiding Judge Leody Opolinto ti MTCC, Branch 3 ken Presiding Judge Roberto Mabalot ti MTCC, Branch 1 ti Baguio City,
Nabigbig dagitoy a da Junilyn Bringas Dabalos, 44; Ronaldo Sales Agsalud, 46 ken Joselito Garcia Picarzos, 63.
Nakemmeg met iti naisayangkat a follow-up operation sadiay metlaeng Sindalan, San Fernando, Pampanga ti lider ti grupo a nabigbig a ni Grace Decano De Guzman, 58 a residente ti San Fernando City, Pampanga.
Maibasar iti report ti BCPO, nangrugi ti operasyon ti Phoenix Blitz ditoy Baguio City idi April 2018 a maatap a nangbiktimaanda kadagiti negosyante ken dagiti online seller networking groups a naka-alaanda iti dumanon P4.5-M.
Maibagbaga a naallukoy ti grupo dagiti biktima a mangipuonan iti kwartada kasukat ti 30 percent a return on investment iti uneg laeng ti makabulan, no sadino, ti impuonanda a kwarta ket maikabil iti foreign exchange market.
Nupay kasta, kinasuan dagiti biktima ti grupo kalpasan a saan a naisubsubli ti impuonanda a kwarta.
Sumangsango da De Guzman, Dabalos ken Agsalud iti kaso a 10 a bilang ti estafa bayat a sumangsango ni Picarzos iti kaso nga innem a bilang ti estafa.
Nupay kasta, napalubusan dagitoy nga agpiansa iti sag-P560-K.
Maibasar pay iti rekord ti pulisya, ni De Guzman ket No.1 Top Most Wanted Person (TMWP) ti BCPO-Station 2.
Kabayatanna, ni Dabalos ket No. 8 TMWP; ni Agsalud ket No. 9 TMWP ken ni Picarzos ket No. 10 TMWP ti BCPO-Station 8.
