Nakabalud itan iti Sibuco Municipal Police Station ti mapapati a mastermind iti panangkidnap iti American vlogger a ni Elliot Eastman sadiay Zamboanga del Norte.
Iti maysa a report, kinunana ti Police Regional Office – Zamboanga Peninsula a ti suspek ket nabigbig a ni Ustadz Jakaria Jamani, a nakemmeg iti nasao a lugar a bumallasiw iti Basilan Strait idi Martes ti malem.
Ni Jamani nga agtawen ti tallo pulo ket lima ket nakemmeg babaen ti bileg ti arrest warrant gapu iti “kidnapping” ken “serious illegal detention” nga impaulog ti maysa a korte idiay Siocon, Zamboanga del Norte.
Ni Eastman nga agtawen ti duapulo ket innem a tubo idiay Vermont ken nakiasawa ti maysa a Pilipinas ket kinidnap ti uppat a gunmen manipud iti pagtaenganna idiay Barangay Poblacion sadiay Sibuco idi Oktubre 17 idi napalabas a tawen.
Dagiti nangkidnap kenkuana ket saan a dimmawat ti “ransom” para iti pannakawayawayada ken saanda a pulos a nakiuman iti pamiliana.
Idi Disiembre 5, kinuna dagiti otoridad a pimmusay ni Eastman iti rabii a pannakakidnapna ken naitapuak ti bangkayna iti baybay, a dinakamatda dagiti testimonia ti maysa a saksi ken maysa kadagiti suspek iti pannakakidnap.
Iti agdama, saanda pay a nabirukan ti bangkay ni Eastman
