Inkari ti Anti-Money Laundering Council (ALC) a sukimatenda ti mapapati a transaksion iti nagbaetan ni dismissed Bamban Mayor Alice Guo ken ti property development company nga Alphaland Corporation sadiay Itogon, Benguet.
Kasaruno daytoy ti impakita ni Manila Representative Bienvenido Abante bayat ti inquiry iti House quad-committee idi September 19, 2024 a kopya ti tseke ni Guo kas pammaneknek a nangipaay daytoy iti downpayment iti loghouse nga aggatad iti P85 Million.
Nupay kasta, kinuna ni Guo a saan daytoy a natuloy ken pinaglibakanna a nainagan ti nasao a sanikuana iti masya nga indibidual nga agnagan iti Anne Jaime.
Iti baet daytoy, impaganetget ni Abante nga immanamong ti Alphaland Management a mayakar ti sanikua ni Alice Guo manipud iti naganna iti korporasion.
Inwaragawag met ti sigud a mayor ti karbenganna kontra iti self-incrimination kadagiti saludsod maipapan iti dadduma pay a transaksion iti banko gapu iti agdama a kasona a money laundering.
Immuna metten a kinunana ni AKO BICOL Party-list Representatives Raul Bongalon a sipud nangrugi ti kontrobersia kenni Guo ket adda metten ti mapapati a panangiyakar kadagiti sanikuana, panangilako kadagitoy iti nababa a presio ken dadduma pay.
Maipalagip a nangipaulog ti Court of Appeals idi Hulio iti agdama a tawen iti freeze order kadagiti amin nga assets ni Guo ken dua pay nga indibidual, gapu iti mapapati a pakainaiganda iti illegal nga operasion ti Philippine Offshore Gaming Operators agingga intun Enero a dies iti sumaruno a tawen.
