BAGUIO CITY – Indepensa ti Philippine National Police (PNP) ti Cordillera Police Regional Office (PRO-COR) kasaruno ti panagbalin a viral iti social media ti ladawan ti dadaulo ti pulisya iti rehiyon a mapapati a mangin-inspeksion kadagiti vote-counting machines (VCMs) ken dadduma nga election paraphernalia a naiturong iti siudad ti Baguio.
Makita iti ladawan ti arigna panang-inspeksion ni Brigadier General Israel Dickson, regional director ti PRO-COR kadagiti VCMs ken dadduma nga election paraphernalia iti warehouse ti COMELEC ditoy Baguio idi napalabas a lawas.
Dimmanon ti ladawan kenni COMELEC Commissioner Rowena Guanzon ken iti social media account daytoy ket kinuwestionaranna ti intension ni Dickson.
Iti tweet ni Guanzon, kinunana nga awan ti asinoman a napalubusan a manginspeksion kadagiti warehouse ti komisyon nga awanan ti pammalubos nga uray pay dagitoy ket direktor ti PNP.
Dinakamatna pay a ti panaginspeksion iti election paraphernalia ket saan a karaman iti mandato ti PNP.
Nupay kasta, sinungbatan daytoy ni Police Colonel Bernard, panakangiwat ti PNP ken kinunana a nupay saan a mandato dagiti pulis a manginspeksion kadagiti VCMs ken dadduma nga election paraphernalia, mandato met dagiti pulis a mangipasigurado iti “overall security” iti masungad nga eleksion inton May 13, pakairamanan ti transportasyon dagiti materyales.
Agtalek daytoy a saan a panaginspeksion kadagiti VCMs ti inaramid ni Dickson ngem ketdi, ti panangtungpal ti dadaulo iti PROCOR iti mandatona.
Innayonna a naipaayan iti pammalubos ni Dickson gaputa no saan ket saan a nakastrek iti warehouse ti komisyon.
Impetteng met ni Dickson nga awan ti inspeksion kadagiti VCMs a naipatungpal idi sinarungkaranna ti warehouse ti COMELEC.
Inlawlawagna a ti panggep ti panagturongna iti nasao a warehouse ket tapnu kitaenna ti aktuwal a deployment dagiti pulis a paset ti election security preparations ti Cordillera PNP.
Innayonna a ti aktibidad ket regular a police function, nangruna ta ti Cordillera Region ket naka-full alert gapu iti kaudian a kinaranggas nga inaramid dagiti komunista a rebelde ditoy rehiyon ken iti sumagmamano a paset ti Visayas ken Mindanao.
Inyunay-unay ni Dickson nga awan ti intensionna a manginspeksion iti warehouse ngem ketdi, dagiti laeng pulis a nadutukan nga agbantay iti nasao a pasdek.
Naamuan kenkuana a ti nasao a panagsarungkar ket napasamak idi April 17 kabayatan ti Holy Wednesday.
Innayonna a naigiddan laeng a kabayatan ti supervision ket naibaba dagiti VCMs ken awan ti nakitada a warehouse supervisor manipud iti COMELEC para iti koordinasyon.
Impettengna pay nga awan ti nalabsing a linteg ken resolusyon ti COMELEC.
