Inlawlawag iti Baguio City Police Office- Station 7 ti napasamak a mapapati a panaghold up iti maysa a taxi driver iti maysa a pasahero na, pasado alas nuebe ti rabii idi September 16, iti nagbaetan iti Justice hall ken BFP-Baguio Building.
Iti initial nga imbistigasyon, nagpara iti babae idiay Magsaysay Avenue ken agturong kuma daytoy idiay San Luis Extension.
Naaddaan iti diskusion ti pasahero ken taxi driver gapu ta sigun iti driver, narigat kenkuana ti panagmaneobra wenno panag-reverse iti lugar a papananda.
Sakbay dagitoy a makadanon iti Baguio City Police Station 7, binagaan ti complainant ti driver nga isardengna ti taxi ngem saan daytoy nga insardeng ti driver gapu iti mapapati a butengna nga ipulong daytoy ti pasaherona.
Apaman a nakadanon dagitoy iti kalsada iti batog ti Justice Hall ken BFP Station, mapapati a nangngeg ti complainant ti maysa nga indibidual a nagsao babaen iti cellphone ti suspek a nangibaga a ” Hold Up En dayta a babae”.
Gapu iti buteng ti pasahero, linukatanna ti tawa ti taxi ket nagriyaw nga agkidkiddaw iti tulong, a dagos met a nirespondean kadagiti kameng ti BCPO Station 7.
Kalpasanna, inturog dagiti police personnel ti taxi driver ken ti complainant iti istasyon para iti umno a pannakaasikaso iti kaso.
Sigun iti imbestigasyon dagitoy, awan ti anyaman nga elements ti robbery iti napasamak nga insidente kas iti kinaranggas wenno intimidation with weapon.
Innayon dagitoy a nagbasar laeng ti complainant iti nangngeg ti pasahero a babae a sarita nga ‘hold up”.
Inlawlawag pay ti pulisya nga awan ti naala nga anyaman a banag manipud iti complainant kasta met nga awan ti napasamak nga intimidation.
Nairefer metten ti insidente iti Duty Inquest Prosecutor , a nangipaay iti rekomendasyon a maipatungpal ti case build-up ken mapili ti kaso babaen iti regular filing, kas iti resulta ti imbestigasyon.
Maibasar pay iti imbestigasyon, saan a mabilang a robbery hold up ti nasao a kaso gapu ta awan ti anyaman nga elements a mangpaneknek idi daytoy.
Nupay kasta, agtennag latta daytoy iti unjust vexation wenno human conduct causing unjust annoyance, irritation, or mental distress to another person without needing physical or material harm. //via Bombo Khey Reparip
