BAGUIO CITY – Pangpanggepen ita ti Provincial Health Office ti Benguet ti panakaisayangkat ti mapping kadagiti sitio ken barangay iti probinsia nga addaan ti nababa a vaccination rate kasaruno ti naobserbaran a nababa a vaccination rate ti entero a probinsia.
Sigun kenni Benguet Provincial Health Officer 1 Dr. Meliarazon Dulay, babaen iti nasao nga addang ket mabigbig dagiti lugar iti probinsia nga addan bassit a bilang ti nabakunaan nga umili ken dagiti pakaseknan dagitoy iti bakuna.
Kinunana a dagiti mabigbig a lugar ti matutukan ken pakaipatungpalan ti panagbakuna kontra iti COVID-19.
Maipalagip a saan paylaeng a naragpat ti Benguet ti 70% herd immunity wenno ti puntirya a bilang dagiti umili a mabakunaan kontra iti COVID-19.
Maibasar iti rekord, dumanonen ti nasurok 338,700 nga indibidual ti nabakunaan iti maysa a dose sadiay Benguet a katukad ti 61% ti puntirya a popolasyon bayat a 52.77% wenno nasurok 178,700 nga umili sadiay ti fully vaccinated.
