BAGUIO CITY – Opisyalen a naiproklama ken nagsapata kas mayor ti Paracelis, Mt Province ni Marcos G. Ayangwa idi Nobyembre 25.
Iti interview ti Bombo Radyo, kinuna ni Atty. John Paul Martin, spokesperson ti COMELEC-Cordillera, napasamak daytoy tapno matuldokanen ti isyu a tallo ti agtugtugaw a mayor ti Paracelis.
Maipalagip a nangipila ni Ayangwa ti kandidatura kas mayor ti Paracelis para iti May 2022 Elections kalabanna ti challenger a ni Avelino C. Amangyen.
Nupay kasta, nangipila ni Ayangwa ti petisyon a mangkankanselar iti Certificate of Candidacy base on the ground of material misrepresentations.
Idi nalpas ti eleksyon, nangabak ni Amangyen ngem saan pailaeng a narisut ti petisyon nga impila ni Ayangwa seknan iti panakakanselar ti kandidaturana.
Nupay kasta, sumagmamano pailaeng nga aldaw sakbay ti eleksyon ket addan ti desisyon ti COMELEC Division a mangibagbaga a kanselado ti kandidatura ni Amangyen.
Gapu met ta nakaipila ni Amangyen ti Motion for Reconsideration iti COMELEC En Banc, naiproklama metlaeng daytoy kas mayor ti Paracelis.
Nupay kasta idi laeng Oktobre, impetteng ti Commission En Banc ti desisyon ti COMELEC Division a kanselado ti COC ni Amangyen.
Gapu iti daytoy, pinal ken executory a nagconvene ti Municipal Board of Canvassers ken isuda ti nangiproklama kenni Ayangwa kas mayor ti Paracelis, Mt Province.
Maipalagip nga inwaragawag ti COMELEC 2nd Division nga adda ti misrepresentation iti kandidatura ni Amangyen gaputa saanna nga inlanad a na-convict iti kaso a panaglabsing iti PD 705 wenno ti Illegal Logging ken Qualified Theft) idi Abril 11, 2018.
