BAGUIO CITY – Inkari ti Baguio Flower Festival Foundation, Incorporated (BFFFI) ti mas engrande ken mas napimpintas a selebrasyon ti Baguio Flower Festival wenno Panagbenga inton sumaruno a tawen.
Inwaragawag ni BFFFI media officer Andrew Pinero ti nasao a kari iti panakiyuman ti Bombo Radyo Baguio kasaruno ti panangkanselar ni Mayor Benjamin Magalong kadagiti naituding a dadakkel nga aktibidad ti Panagbenga a marugian kuma inton March 21.
Inlawlawagna a ti addang ket kankanunongan ti BFFFI para metlaeng iti kinatalged ti publiko manipud iti COVID-19.
Sigun kenkuana, ita a tawen ti maika-25 a tawen wenno silver anniversary ti Panagbenga ngem gapu iti pangta ti COVID-19 ket saan unay a marambakan ti pestibidad.
Impasiguradona pay nga uray awan ti P4-M a subsidiya manipud iti lokal a gobyerno ti Baguio para iti panakaisayangkat ti Panagbenga ket matungpalda ti engrande a selebrasyon ti pestibidad inton 2021.
Kabayatanna, kednganen ti Chief of Staff ti Panagbenga 2020 ken ti secretary ti Baguio Blooms ti gasat ti nasao a trade fair a masarakan iti sangwanan ti Baguio Convention Center.
Kinuna ni Pinero nga agtaripnong ti dua nga opisyal tapnu adalen ken pagsaritaan dagitoy ti kasayaatan iti nasao a trade fair.
Nupay kasta, impeksana a rumbeng laeng a maisardengen ti Baguio Blooms kasaruno ti panakakanselar dagiti daddakkel nga aktibidad ti pestibidad.
Inlawlawagna met laeng a daytoy ket gaputa dakkelen ti lugi dagiti vendors a nakapwesto iti nasao a trade fair.
Linawlawaganna a no saan pay a naipaluspos ti subsidiya para kadagiti pagadalan a makipaset kuma iti drum and lyre ken street dance parade competitions ket saanen a mairuar pay ti pondo.
Malaksid iti daytoy, dinakamatna nga awan pay ti simrek a dadakkel nga sponsorship iti Panagbenga ken no adda man ti mai-refund kadagiti sponsors ket babassit laeng dagitoy a gatad.
Innayonna nga urayenda ti pammilin ti lokal a gobyerno ti Baguio no anya ti maaramid kadagiti disenyo kadagiti center isle kadagiti kalsada iti siudad nga inmuntar dagitoy kas paset ti dekorasyon iti Panagbenga.
Kinunana pay a matuloy landscape competitions, pakairamanan dagiti school-based landscape competitions gaputa nalpas metten ti entries dagitoy nupay agtaripnong paylaeng ti foundation tapnu kitaenda no adda ti umdas a pondo para kadagiti mangabak iti nasao a kompetisyon,
