Awan pay ti naawat a reklamo ti opisina iti mayor idiay Atok, Benguet manipod kadagiti mannalon seknan iti epekto iti andap kadagiti mula dagitoy a nateng.
Iti panakiuman iti Bombo Radyo kenni Atok Mayor Franklin Smith, kadawyanen a mapaspasaran ti kapada a phenomenon rason nga addan dagiti remedyo nga ipatpatungpal dagiti mannalon tapno saan a madadael dagiti mula dagitoy a pagdisdiswan iti andap partikular iti agsapa.
Iti baet nga awan pay ti mannalon a nangipadanon iti pakaseknanna,inaklon ti Mayor Smith a maysa a karit ti panag-andap nangruna nu saan a dagus a masibugan dagiti mannalon dagiti mulada a naandap kas iti bulong iti patatas a nalaka a madadael ken daduma pay.
Mainaig iti dayta, dinakamat ti mayor a nairuam metten dagiti dingwen kas iti baka iti panakapasar iti andap.
Maipalagip nga iti agdama a tawen, nangrugi a napasaran ti andap iti nasao a munsipyo idi January 20 nu sadino, adda dagiti sumagmamano a netizen iti nangibinglay iti naalada a litrato dagitoy.
Kabayatanna, napasaran matlaeng kadagiti simmarsaruno pay nga aldaw ti kapada a phenomenon kas idiay Madaymen, Kibungan,Benguet, ken idiay Monamon Sur, Bauko, Mt. Province.//Bombo Rob Dominguez
