Manarimaan ti panakaisayangkat ti satellite registration idiay Cordillera Career Development College (CCDC) La Trinidad, Benguet.
Iti panakiuman ti Bombo Radyo kenni Atty.Elenita Capuyan,ti Provincial Election Supervisor iti Benguet, ita ti maudi nga aldaw a maipatungpal ti satellite registration rason a maguyguyugoy dagiti saan pay nakapagparehsitro nga agturong iti pakaang-angayan daytoy.
Sigun kenni Atty.Capuyan,amin a munsipyo iti Benguet ket nakipaset iti nasao nga aktibidad malaksid laeng iti munsipyo iti Tublay, Mankayan, ken iti Baguio City.
Nakasagana nga mangakomodar kadagiti agparehistro amin dagiti munsipyo nga adda sadiay Cordillera Career Development College (CCDC) ita nga aldaw.
Iti sabali a bangir, dumanon metten iti mapatta-patta a nasurok uppat a ribo ti pakabuklan a bilang dagiti nakapagparehistro iti probinsya iti Benguet, malaksid iti Baguio City.
Innayon ni Atty.Capuyan a karaman kadagiti karit a sangsangwenda ti saan a panagparehistro nangruna dagiti agtutubo gapu ta sigun kadakuada ket saanda a kasapulan daytoy ken ti kurang nga awareness wenno panakaammoda iti midterm elections.
Malaskid iti dayta, maysa metlaeng a karit dagiti botante a nadeactivaten dagiti nagnaganda.
Iti sabali a bangir, mangrugin ti filing of Certificate of Candidacy (COC) inton Oktubre 1-8 para iti umadani nga election inton May 12 ita a tawen.
Sigun paylaeng kenni Atty.Capuyan, mangrugi iti alas otso ti agsapa ken agleppas iti alas singko ti malem ti nasao nga aktibidad, saan a kas idi napalabas nga agingga alas dose ti tengnga ti rabii ti panangipila ti kandidatura.
Dagiti kasapulan a dokumento iti panangipila iti kandidatura ket ti form, birth certificate, ID, documentary stamps ken dadduma pay.
Mabalin metlaeng a bisitaen ti aniaman nga opisina ti COMELEC.//Bombo Rob Dominguez & Bombo Genzel Depayso
