Impanamnama ni Baguio City Mayor Benjamin Magalong nga addan iti last phase iti road development iti Lakandula Street iti Brgy. Kagitingan, Baguio City.
Maipalagip a nangrugi iti development idi napalabas a tawen no sadino addaan ti nasao a proyekto iti nasurok P19 Million a pakabuklan a project cost.
Sigun iti alkalde, panggep iti nasao a proyekto a tapno mapagtalinaed ti kalmado a panagdalyasat dagiti lugan no sadino naikkan iti cobblestones iti nasao a kalsada.
Ti cobblestone ket maar-aramat kas traffic-calming measure tapno mapabuntog ti panagdalyasat iti lugan tapno agbalin a natalged iti panagpagna dagiti tao iti nasao nga area.
Nupay kasta, iti agdama, manarimaan iti panag-grind kadagitoy gapu ta nangato unay ti naikabil para kadagiti lugan.
Maipalagip a nakaawat iti sumagmamano a pammabalaw ken panagdanag ti nasao a proyekto manipud iti publiko gapu kadagiti cobblestones nangruna iti panagtutudo.
Sigun ngamin iti publiko, mapapati a saan nga komportable a pagnaan dagiti cobblestones para kadagiti persons with disabilities nangruna kadagiti wheelchair users gapu ta nakadlis daytoy.
Kabayatanna, impeksa ni Magalong a naterminate ti umuna a contractor dagiti proyekto idiay Lapu-Lapu Street, Kalantiao Street, ken Gregorio H Del Pilar, nga addaan nasurok P8M a project cost,
Iti agdama, addan iti baro a contractor iti nasao a proyekto a manamnama a mangleppas iti road development iti nasao a lugar.
Maipalagip met a nakaawat iti pammabalaw dagiti nasao a proyekto gapu iti kinabayag iti pannakapalpas iti daytoy. //via Bombo Khey Reparip
