Nakasaganan ni Mayor Benjamin Magalong a mangideklara iti Baguio City Hall ken amin a dadduma pay nga opisina ti gobierno iti siudad kas smoke-free ken vape-free zone.
Ti addang ket paset ti action plan ti lokal a gobierno ti siudad tapno mapapartak pay ti panangipatungpal iti smoke ken vape-free a pagalagadan, ken maituloy ti estado ti Baguio kas modelo a siudad para iti panangkontrol ti tabako.
Kasaruno ti pannagabak ti Baguio iti maysa nga international award a 2025 Bloomberg Philanthropies Awards for Global Tobacco Control–gapu iti panagreggetna a mangmonitor iti pannakakessay ti panangusar iti tabako.
Sigun kenni Mayor Magalong, kasapulan nga agserbi ti siudad kadagiti dadduma iti panagtulnog iti “no smoking” ken “no vaping” a linteg nangruna ti Ordinance No. 34 -2017 wenno ti Smoke-Free Baguio Ordinance ken Civil Service Commission Memorandum Circular No. 17-2009.
Ti Ordinance No. 34-2017 ket mangiparit iti panagaramat, panangilako, panangiwaras ken panangitandudo ti sigarilio ken dadduma pay a produkto ti tabako iti uneg ti 100 a metro manipud kadagiti pagadalan, public playgrounds, ken dadduma pay a pasilidad a masansan a pagturturungan dagiti menor de edad.
Kabayatanna, nakalanad met iti CSC MC No. 17-2009 a rumbeng a 100% nga smoke-free environment ti amin a pasdek ti gobierno, opisina ken paraangan ti gobierno.
