BAGUIO CITY – Saanen a makibiang ti opisina ni Mayor Mauricio Domogan iti kontrobersiya iti Registry of Deeds (ROD) – Baguio.
Inlawlawagna nga awan ti naawatna a reklamo kontra iti maatap nga anomalya iti nasao nga opisina partikular iti dadaulo a ni officer-in-charge Rodil Rivera.
Kinunana nga ipaimana laengen iti lokal a konseho ti imbestigasyon iti nasao a kontrobersia gaputa addaan dagitoy iti dakdakkel a bileg a mangadal iti naidanun a reklamo.
Innayonna a mabalin met laeng a mangipasa ti lokal a konseho iti maysa a resolusion para iti panakasukat ti mairekreklamo a ni Rivera iti kanito a mapaneknekan a pudno dagiti reklamo dagiti kliente kontra iti ROD-Baguio.
Maipalagip nga uppat nga indibidual ti nagrekamo iti lokal a konseho mainaig iti maatap a panagkiddaw ni Rivera ken ti staff daytoy iti P5,000 kasukat ti napartak a panakaipaay ti titulo ti daga dagitoy iti baet a kompleto dagiti dokumento dagitoy.