BAGUIO CITY – Nagbalin nga emosyonal ni Baguio City Mayor Benjamin Magalong iti isasangona kadagiti umili ti siudad iti naangay a flag raising ceremony sadiay City Hall idi agsapa.
Iti mensahena, inladawanna nga stressful unay ken makapabannog ti napalabas a lawas kasaruno ti panakababalawna gapu iti panagdar-ayna iti birthday celebration ti events organizer a ni Tim Yap a nakaobserbaran ti panaglabsing iti health protocols.
Kagiddan iti daytoy ket inyulitna manen nga inyestorya ti napasamak ken inlawlawagna ti rason iti panagdar-ayda nga agasawa iti nasao a pasken.
Kinunana a nagbalin a sensational unay ti napasamak ken nagaramid dagiti tattao iti bukodda a pattapatta malaksid nga adu unay dagiti biddut nga interpretasyon ken adu a kinaulbod ti naiwaras.
Dinakamatna a kadaksan ditoy dagiti below the belt a komento a naawatna.
Innayonna a saan laeng a daytoy ti napasaktan, ngem ketdi, nangruna ti pamilyana gaputa uray ti asawana ket mabutengan a rumwar.
https://www.facebook.com/bomboradyobaguio/videos/823544804898866
Nupay kasta, pinagyamananna ti napintas nga intunda ti insidente gaputa naduktalanna a dagiti pagtaltalkanna ket kritiko wenno kontra kenkuana.
Sigun kenkuana, dagiti nasao nga indibidual ti nangiruar kadagiti social media warriors a nagaramid kadagiti sayangguseng nga awanan met ti natibker a basaran.
Nupay kasta, inkari latta ni Mayor Magalong ti saanna a panangbaybay-an wenno panangibati dagiti mangbabbabalaw kenkuana iti baet ti insidente.
