BAGUIO CITY – Nagbalin nga emosyonal ken nakasangit ni Baguio City Mayor Benjamin Magalong kabayatan ti ecumenical prayer rally para iti kinatalgedna ken ti pamilyana kasaruno dagiti naaw-awatna a pangta iti biag gapu kadagiti nagbalin nga expose-na sadiay Senado seknan kadagiti ninja cops ken dadduma pay a korapsion iti Philippine National Police (PNP).
Inorganisa ti religious sector ti nasao a prayer rally a naisayangkat sadiay Malcolm Square idi Dominggo.
Nagparintumeng ni Mayor Magalong iti sangwanan dagiti naitugkel a kandela ken inkararagan daytoy dagiti umili kagiddan ti panagkararagna ken iti panagtakderna ket sadiayen a naisangitan ti ama ti siudad.
Iti panagbitlana, inaklonna a naklaat daytoy gaputa ti ammona ket simple ken nabiit laeng ti prayer rally ngem saanna a ninamnama nga agbalin a solemn ti aktibidad.
Kinunana a nariknana ti nabara a suporta dagiti umili ti Baguio kenkuana ken iti pamilyana.
Innayon ti sigud a dadaulo ti PNP-CIDG a napabileg ken naipaayan daytoy iti kanayonan nga inspirasyon tapnu ituloy ti narugianna.
Nagkiddaw met daytoy iti dispensa kadagiti umili ti siudad ti Baguio gaputa saanna unay a natutukan ti siudad kabayatan ti panagbalinna a resource person sadiay Senado.
