Nagballaag ni Baguio City Mayor Benjamin Magalong kadagiti indibidwal nga agsingsingir iti parking fee kadagiti pampubliko a lugar, nangruna kadagiti saan nga agipaay iti resibo kadagiti motorista.
Impaganetget ti mayor a saan a basta-basta lattan ti panangsingsingir iti parking fee kadagiti pampubliko a lugar, no awan ti pammalubos ken awtorisasyon manipud iti lokal a gobierno.
Inlawlawagna a dagiti naituding laeng a parking areas nga awaten ti lokal a gobierno ken addaan kadagiti awtorisado a parking attendants ti mabalin a mangsingir iti parking fees.
Masapul met nga agipaay dagitoy iti opisial a resibo kadagiti motorista kas pammaneknek iti panagbayad da.
Karaman metlaeng kadagiti adda karbenganna a mangsingir kadagiti parking fee ket dagiti pribado nga establisiyemento nga addaan iti bukodda a parking areas.
Sigun kenni Magalong, sukimaten ti lokal a gobierno dagiti report ken reklamo maipapan iti panagsingir iti parking fee kadagiti pampubliko a lugar.
Inlawlawagna met a maipatungpal dagiti umiso nga aksion kadagiti mapaneknekan a saan a legal ti panagkolektada.
Posible metlaeng a sumango dagitoy iti legal a panangusig.
Gapu iti daytoy, pinalagipanna dagiti motorista nga agannad ken kiddawenda ti opisial a resibo no adda mangsingir kadakuada iti parking fee.
Pinalagipan met ti lokal a gobierno kadagiti residente ken bisita a ipakaammoda kadagiti awtoridad no makasangoda kadagiti indibidwal nga agkolekta iti bayad kadagiti saan nga otorisado a parking areas.
