BAGUIO CITY–Inkalintegan ni Baguio City Mayor Benjamin Magalong ti rason ti panakapukan dagiti kayo iti passet ti Road Widening sadiay BGH Rotonda.
Sigun kenkuana, passet daytoy ti panakapadur-as ti nasao a kalsada ti siudad ken maysa daytoy a National Project isu’t gapuna a kasapulan a suportaranna daytoy.
Kinunana a maysa ita a pakaseknan ditoy lokalidad ti nangato a carbon emmision ken nailet a trapiko isu’t gapuna a makatulong daytoy iti strategic project nga ipatpatungpalda iti agdama.
Gapu iti dayta, kiniddawna ti pannakaawat dagiti umili seknan iti nasao a banag.
Kinunana pay nga adda ti maisayangkat a taripnong iti religious sector ken kadagiti kangrunaan a maapektaran a residente iti maisaysayangkat a road widening tapnu mailawlawag daytoy kadakuada.
Inlawlawagna a saan pay a marikna iti agdama ti trapiko ngem iti kanito nga agsubli iti normal ti sitwasyon ket possible nga umadon to manen dagiti bisita nga agturong iti siyudad isu’t gapuna a nasken a maiaramidanen daytoy iti solusyon kabayatan ti pandemya.
Innayunna a kasapulan a mabalanse ti pannakasalaknib kadagiti kaykayo ken makontrol ti carbon emmissio.
Iti baet ti dayta, impanamnama ni Mayor Magalong a masukatan dagiti mapukan a kayo kasaruno iti panangkiddawna kadagiti developers ti road widening project a nasken nga agmula dagitoy iti 200 a kayo kas sukat ti tunggal kayo a pukanen dagitoy.
Immunan iti dayta, impettengna a nainget iti pannagadal nga impatungpalda sakbay a naipalubos ken naipaay ti cutting permit dagiti developers manipod iti DENR.
Kabayatana, manarimaan metten ti panagsapul iti CEPMO para iti natalged a pagmulaan dagiti kayo a immula kas sukat dagiti mapukan iti nasao a proyekto.
