Naglusulos ni Baguio City Mayor Benjamin Magalong kas special adviser iti Independent Commission for Infrastructure (ICI).
Daytoy ket kasaruno ti panangiwaragawag iti Palasyo Malacañang a marebrebyu ti panakadutok daytoy gapu iti maatap a conflict of interest.
Iti insurat ni Magalong iti resignation daytoy, nakalanad nga agtaltalinaed a ti pagsayaatan ken interes dagiti umili iti Baguio City ti ipangpangrunana kas maysa nga agserserbi iti publiko.
Ni Magalong ket immunan a naakusaran iti posible a panaglabsingna iti paglintegan seknan iti panakaipawil kadagiti opisyales iti gobyerno nga aggiddan nga agserbi iti dua a posisyon wenno akem.
Mainaig iti dayta, nagbalin metlaeng a saludsod ti maysa a proyekto iti Summer Capital a nai-award iti St. Gerrard Construction General Contractor and Development Corporation—maysa kadagiti kompanya a maatap a tagikua dagiti kontraktor a da Cezarah Discaya ken Pacifico Discaya II nga adda ti pakainaiganna iti maim-imbestigaran ita a flood control projects.
Nupay kasta, inlawlawag metten ni Magalong a sinurot ti Bids and Awards Committee (BAC) ken dagiti implementing offices iti tennis court ken parking building iti siudad dagiti amin a ligal a proseso para iti daytoy.