BAGUIO CITY – Nainget a binallaagan ni sigud a PNP-CIDG chief ken ita ket Baguio City Mayor Benjamin Magalong dagiti agpangpangta iti biagna kasaruno ti panangibutaktakna iti isyu ti ninja cops.
Kasaruno daytoy ti panagaklonna a manipud pay idi napalabas a lawas ket makaaw-awaten daytoy ti death threats kalpasan a nagtestigo seknan kadagiti ‘ninja cops’.
Inaklonna a nakaro a madandanagan daytoy iti bukodna a seguridad, iti kinatalgaed ti pamilyana, pakairamanan ni PDEA Director General Aaron Aquino.
Nupay kasta, impettengna kadagiti agpangpangta iti biagna a no adda ti aramidenda kenkuana ket nasken a siguruen dagitoy a saan daytoy a makalasat gaputa no makalasat ket ‘hell will break lose’.
Kabayatanna, inladawan ni Mayor Magalong a ‘worth it’ ti panagtestigona sadiay Senado iti baet dagiti maaw-awatna a death threats.
Naamuan a gapu iti maaw-awatna a pangta iti biag ket pinasublina ditoy Baguio City ti anakna a lalaki a naka-base sadiay Pangasinan bayat nga agtaltalinaed nga okay ti dua nga annakna a babbai.
Maipalagip nga immuna a nagtestigo ni Mayor Magalong sadiay Senado idi September 19 ken ditoy nga imbutaktakna no kasano nga ilaklako dagiti ninja cops ti ilemlemmengda a paset ti makumkumpiskarda nga iligal na droga kadagiti lehitimo nga operasyon – maysa nga scheme a sigun kenkuana ket addaan koneksion iti sumagmamano nga aktibo a high-ranking police officers. (-with Bombo Jordan Tablac)
