Sinungbatanen ni Baguio City Mayor Benjamin Magalong ti “cryptic” a kinuna ni Leyte 4th District Representative Richard Gomez kasaruno ti kinuna ni Mayor Magalong a mangak-akusar kadagiti sumagmamano a kameng ti Kamara a karaman iti korapsion.
Iti interview ti Bombo Radyo kenni Mayor Magalong, inyebkasna a situtulok a tumabuno iti panagdengngeg ti Senado kas maysa a resource person kalpasan nga inakusaranna ti sumagmamano a kongresista a mangim-impluensia iti pannakadutok dagiti district wenno regional engineers iti Department of Public Works and Highways (DPWH), a nangpabileg pay iti kurapsion kadagiti opisial.
Sigun kenkuana, ur-urayenna laengen ti notice manipod kadakuada.
Kasaruno daytoy ti dinakamat ni Leyte 4th District Rep. Richard Gomez ti maysa a saanen a nainaganan a mayor iti siudad a nangidatag kadagiti alegasion kontra kadakuada a mammanday-linteg, babaen ti panangdakamatna a rumbeng a tarimaanen nga umuna ti bukodna a siudad sakbay nga itudona dagiti ramayna kadagiti dadduma.
Saan nga innaganan ni Gomez ti mayor, ngem itay napalpalabas a bulan, ni Mayor Benjamin laeng ti mangak-akusar kadagiti mammanday-linteg iti publiko a karaman iti korapsion seknan kadagiti infrastructure projects.
Idi met nadamag ni Magalong nu adda posibilidad nga idauloanna ti imbestigasion iti DPWH anomalies, kinunana nga awan pay ti naawatna a direktiba manipud kenni Presidente Marcos Jr. ken urayenna ti opisial a pammilin.
Kabayatanna, imbinglay ni Magalong nga impadamagna ti flood control project anomalies ken ni President Marcos Jr., partikular iti Baguio.
Inlawlawag pay ni Magalong dagiti ibagbaga dagiti dadduma a babalawenna ti agdama nga administrasion. Sigun iti alkalde, dagiti isyu laeng ti babalawenna, saan daytoy a mangiwarwaras iti gura.
