BAGUIO CITY – Naibilin ti panakasuspindir ti mayor ti Rizal, Kalinga ken ti dua a department heads ti munisipyo iti uneg ti makatawen nga awanan ti bayad.
Nailanad iti desisyon ti Office of the Ombudsman nga inaprobaran ni retired Ombudsman Conchita Carpio-Morales a ‘guilty’ iti simple misconduct ken conduct prejudicial to the best interest of service da Rizal Mayor Marcelo dela Cruz Jr., Municipal Budget Officer Delia Damasco Jacob ken Municipal Accountant Rodelia Baquiran Busacay.
Naibasura met ti kaso a grave misconduct, conduct prejudicial to the best interest of service, dishonesty ken grave abuse of authority kontra kenni Vice Mayor Renato Vicente, pakairamanan ti lima a konsehal ti Rizal, Kalinga ken sumagmamano pay nga empleyado ti munisipyo gapu iti kinakurang ti ebidensia.
Nailanad iti desisyon nga adda ti umdas a basaran tapnu madusa da Dela Cruz, Jacob ken Busacay iti simple misconduct ken conduct prejudicial to the best interest of the service.
Nagramot ti kaso iti resolusyon nga inaprobaran ti municipal council ti Rizal a nangipalubos iti panaka-aramat ti pondoda a P14.5-M iti rehabilitasyon ti nagduduma a barangay streets ken farm to market roads idi December 2015 a kinuwestionaran ti Commission on Audit gaputa saana legal ti resolusyon.
