Nasarakan dagiti otoridad ti tallo a bangkay iti uneg ti maysa a silver a minivan, kalpasan ti impatungpal dagiti kameng ti Philippine National Police (PNP) a pursuit operaton sadiay Sitio 24, Barangay Meta, Datu Unsay idi Domingo, Enero 25.
Daytoy ket kasaruno ti pannaka-ambush ni Shariff Aguak Mayor Akmad Ampatuan sadiay Shariff Aguak, Maguindanao del Sur iti isu metlaeng nga aldaw.
Sigun iti Philippine National Police – Bangsamoro Autonomous Region in Muslim Mindanao (PNP-BARMM), nabigbig dagiti pimmusay a da Budtong Pendatun, alyas “Rap-Rap”; Teks Pendatun; ken ti maysa nga indibidual a nabigbig a ni alyas “Puasa”.
Amin dagiti biktima ken addaan iti legal nga edad ken residente sadiay Barangay Meta, Datu Unsay.
Maibasar iti report ti pulisya, mapapati a dagiti pimmusay ket suspek iti panaka-ambush ni Mayor Ampatuan.
Maatap a timmakas dagitoy ken nagturongda sadiay Datu Unsay kalpasan ti panang-ambushda iit Mayor.
Dagus nga impatungpal dagiti otoridad ti hot pursuit operation no sadino, ditoyda a nadiskobre ti bangkay dagiti tallo suspek iti uneg ti minivan.
Agtultuloy paylaeng ti imbestigasion seknan iti nasao nga insidente.
