Naideklara a dead on arrival ti maysa a lalaki nga agtawen iti 28, laborer, ken agdama nga agnanaed idiay Irisan, Baguio City kalpasan a nalmes daytoy iti maysa a resort idiay Asin, Nangalisan, Tuba, Benguet idi kalman, Setyembre 21.
Maibasar iti report ti pulisya, napasamak ti insidente iti alas-2 di parbangon ngem naireport laeng iti alas-3:50 ti isu metlaeng nga aldaw.
Nailanad metlaeng iti report, apamanan a nakagteng ti pulisya iti nakapasamakan ti insidente, naitarayen iti pagagasan ti nasao a biktima.
Sigun iti pannakiuman dagitoy iti 27-anyos a witness, nagdive daytoy iti 7 feet a paset ti pool idi nasagidna wenno nariknana ti bagi biktima iti uneg ti danum .
Dagosna nga inyaon ti witness ti bagi ti biktima ken impatungpalna ti CPR babaen iti tulong metlaeng ti kakadwana.
Nupay kasta, saanen a nagsubli ti poot ti biktima.
Gapu iti dayta, dua nga indibidual ti nang-awit iti biktima tapno ilugan iti maysa a pribado a lugan tapno iturong iti pagagasan.
Nupay kasta, naideklara a dead on arrival babaen iti attending physician daytoy gapu iti acute respiratory failure secondary to pulmonary congestion gapu iti pannakalmesna.
Pasado alas-4 ti agsapa idi naiyawid ti bagi ti biktima idiay Irisan iti isu metlaeng nga aldaw.
Pakdaar: Adda iti panagdakamat iti depression ken panagkettel iti bukod a biyag.
Kabayatanna, iti follow-up investigation nga impatungpal ti pulisya iti pagnanaedan ti biktima, rumrumuar nga ada ti pakaistoryaan ti biktima iti pananggandatna a kettelen ti bukodna a biyag.
Sigun iti nanang ti biktima, nangrugi a nagsagaba iti depression ti biktima idi 2023 idi pimmusay ti ama daytoy.
Naobserbaranda a manipud iti pannakapukaw ti ama daytoy, aghalhallucinate ken pasaray agbartek ti biktima.
Innayon met ti kasinsin ti biktima a kaduana a nagturong iti resort, sakbayda a nagturong iti resort, pasado alas-11 ti rabii idi Setyembre 20, nagiinumda pay iti pagtaenganda.
Apaman a nakagtengda idiay resort, intuloyda ti nag-iinom.
Impeksada met nga awan ti nakasipot a naglangoy ti biktima agingga a nagpatulong ti witness.
Iti kaudian a report ti pulisya, saanen a naipasidung ti bagi ti biktima iti autopsy gapu ta patien ti pamilya daytoy nga awan ti napasamak a foul play iti ipupusay daytoy. //via Bombo Noveh Organo
