Nakemmeg ti maysa a babai a nagtaud pay manipod Caloocan City gapu iti panagtakawna ti maysa a selpon manipod iti costumer iti night market idiay Harrison Road itay laeng nabiit.
Patien ti Baguio City Police Office nga idadauloan ni City Director PCol Ruel Tagel a ti agtawen ti 44-anyos nga umili idiay Bagong Barrio, Caloocan City ket maysa kadagiti regular nga agtaktakaw nangruna iti nasipnget a lugar ken kaadoan a tao.
Iti inisial nga imbestigasion, bayat ti panangipatungpal ti intelligence operatives ti Baguio City Police Office-Station 7 iti anti-pickpocket operation iti night market, nagundawayanda ti suspek a tinakawna ti selpon ti maysa nga studiante nga agtawen ti 19 ken residente iti Kabayanihan barangay, Baguio City, a rason met ti dagos a pannakatiliw ti suspek.
Malaksid iti selpon ti studiante a tinakaw ti suspek, narekober metlaeng kenkuana ti maysa nga smartphone nga immunan a natakaw iti nigh market a kukua ti 28-anyos a turista manipod idiay Parañaque City.
Kinuna ti BCPO a nakaalada iti sangapulo ket lima (15) a nagduduma a kita ken brand ti cellphone manipud iti suspek ken naduktalan a kukua dagiti turista dagiti selpon manipud iti nagduduma a lugar kas iti Davao City, Manila ken dadduma pay.
Mapapati a nangrugi ti panagtakaw ti suspek idi Disiembre 1, 2024.
Dagos met a naiturong ti suspek para iti inquest proceedings iti kasona a panagtakaw iti daydi metlaeng nga aldaw.
Sigun iti BCPO, ti operasyon ket paset ti agtultuloy a gannuatda a mangtaming kadagiti insidente ti panagtakaw ditoy siudad a gagangay nga umad-adu iti panawen ti bakasion.
Kabayatanna, pinagyamanan met ni Baguio City Mayor Benjamin Magalong ti Baguio City Police Office gapu iti naballigi nga operasion dagitoy a paset ti intensified campaign tapno marisut ti kriminalidad iti siudad bayat ti Christmas season.
