Imparang ti Commission on Elections (Comelec) iti publiko ti maysa a “ballot face templates” wenno balota a maaramat iti 2025 Midterm Elections.
Ti template ket agserbi a batayan para kadagiti maudi a maimprenta a balota.
Ti nagan dagiti kandidato iti balota ket maimprenta iti “bold font” tapno ad-adda a makita.
Naitampok ti disenio dagiti napasayaat nga a maris ken marka ti seguridad tapno masigurado ti kinatarnaw (integrity) dagiti balota.
Inwaragawag ti Commission on Elections (Comelec) a sangaribo innem a gasut ket innem a pulo ket pito a nagduduma a “ballot templates” ti naileppas, a ti pannakayimprenta ti nasurok a 70 a milion a balota ket naikeddeng a mangrugi inton Lunes, Enero 6.
Dagiti kandidato ken botante ket mabalinda a kitaen ti ballot templates iti official website Commission on Elections (Comelec).
Naikkaten kadagiti template dagiti nadiskwalipikar wenno nuisance candidates, basta pinal ken executory ti desision ti Comelec.
Nupay kasta, agparang latta iti balota ti nagan dagiti kandidato nga addaan iti temporary restraining orders, pending motions for reconsideration, wenno saan pay a narisut a desision manipud iti Comelec En Banc.
Kabayatanna, madama ti panagsagana para iti agarup 4,000 nga automated counting machines, a maiwaras iti intero a pagilian para iti panagsanay kadagiti poll workers.
