BAGUIO CITY – Nadangran ti maysa a balud a nanggandat nga aglibas kalpasan a pinaltugan ti jail officer.
Maibasar iti report ti Baguio City Police Office Station 7, ti balud ket 39-anyos ken adda ti kaso a panaglabsing iti RA 9165 wennu ti Comprehensive Dangerous Drugs Act.
Kinadwaan ti maysa a jail officer ti nasao a balud iti Parole and Probation Office iti ground floor ti Baguio Justice Hall para iti assessment.
Kabayatan daytoy, pasubli dagiti dua iti Baguio City Jail idi killaat a timmaray ti nasao a balud ken ginandatna nga aglibas uray pay nakaposas daytoy.
Kinamat daytoy ti jail officer ngem ad-adda pay a pinartakanna ti panagtarayna rason a pinaltugan ti jail officer ti kinnigid a sakana tapno saan a makalibas.
Dagus met a nagresponde ti BCPO Swat team, personnel ti Station 7 ken kameng ti CDRRMO/EMS ken naitaray ti balud iti Baguio General Hospital para iti operasyon ti sakana.
Sigun iti pulisya, kayat ti nasao a balud a makita ti pamilya rason a ginandatna nga aglibas.
